Orco Bank Bonaire helps young entrepreneurs “Be the Boss of Their Money”

Orco Bank N.V. on Tue, 27 Oct 17:11:34 PM GMT

Orco Bank Bonaire a bishitá studiantenan di e programa Be Your Own Boss di Qredits pa duna un workshòp praktiko tokante kon pa traha un presupuesto. Orco Bank ta orguyoso di ta patrosinadó di e programa i Qredits Bonaire a invitá e banko pa kompartí abilidatnan praktiko di maneho di plaka ku e proksimo generashon di empresarionan lokal. 

E seshon, titulá “Bira hefe di bo plaka”, tabata bou di guia di Tania Obersi, Jendric Janga i Marjely Doran, Personal Bankers na Orco Bank Bonaire. E studiantenan a siña e prinsipionan basiko di entrada, gastu i spar, i kon pa hasi diferensia entre loke nan mester i loke nan ke promé ku nan gasta. 

Tambe nan a praktiká e “metodo di 3 pòchi”: repartí nan entrada mensual entre loke nan mester paga, loke nan ke i loke nan ta spar. E workshòp a mustrá kon kompranan chikí di tur dia, manera un kòfi di $5 òf un lùnch di $10, por suma na mas ku $300 pa luna. 

Pasobra e programa ta enfoká riba kuminsá un negoshi, e seshon a trata tambe kon pa pensa manera un empresario: tene plaka di negoshi i plaka personal separá, paga bo mes un montante fiho kada luna i registrá kada benta i kada gastu. Pa finalisá, kada studiante a traha un presupuesto personal mensual i a fiha su promé meta di spar. Un di e ehèmpelnan tabata spar $100 pa luna durante seis luna pa kumpra un laptop di $600. 

“Nos hobenan tin ideanan grandi, i bon habitonan den maneho di plaka ta yuda pa e ideanan ei bira negoshinan di berdat. Nos ta orguyoso di apoyá Qredits i e programa Be Your Own Boss, i e partisipashon aktivo i kuriosidat di e studiantenan aki a inspirá nos,” Tania Obersi di Orco Bank Bonaire a bisa. 

Pa motivá nos studiantenan pa manehá nan presupuesto di un manera prudente i desaroyá bon habitonan di spar pa futuro, Orco Bank ta ofresé un deposito inisial di USD 25.00 na kada studiante ku ta partisipá den e programa Be Your Own Boss i ku habri un Student Savings Account durante luna di Novèmber. 

Orco Bank ta gradisí e instruktor di BYOB, Sullivan Chin Fung Chun, i señora Eugenie Cossee, e maestra di e klas, pa e invitashon, i ta gradisí e studiantenan pa nan energia i nan ekselente preguntanan. E seshon ta reflehá e kompromiso di Orco Bank pa fortalesé konosementu i abilidatnan finansiero i yuda e komunidat di Boneiru krese.